الأحد، 11 أكتوبر، 2009

دكت بسمار الي ما تتسولف

سلامن عليكم شفت بوية الزاير دكت بسمار بينه بسمار بمقالتة الاخيرة كال هاي مقالة اديولت يعني من الحزام وجوة فاطوا امر تفرق للويلاد والنسوان وكاتبلي دز خليل للديوان يدور واحد لا اعنصري ولا حاقد دينيا انا هم ماجذبت خبر كلت ادزة للولد خاف يقرالة جلمة منا منا وتعال يابو بشت بيش بلشت وهو هذا فضولي كلش يعني اذا يقراء افلام خليعة لابو الكل تعال ياعمي وخلصني شنو خليعة شلون تشرحلة للوليد تحتار بيهه تكلة كارتون ميقتنع تكلة توم وجيري بس مال كبار هم ما يقتنع لو يقراءة صلاح من يحجي على عمامة يكول كاولية.... هم لو اكوا كاولية هسة بالعراق هم جان وديته هناك واشرحلة معناهه بس الكاولية راحوا لاسترالية يصيدون سمج لو تلكاهم لحكوا ابن اخوهم صلاح الساقط .المهم دزيت الوليد كتلة بوية تروح للديوان تجيبلنة انة واحد مو عنصري لو واحد مو حاقد دينيا واذا متلكة تجيب ابو الكرر من ذيلة .... كول راح الولد قريت مقالت بسمار بالكامل فلستهه تفليس كفيلك العباس اخو زينب ... خوما احد عبالة من كلت كفيلك عبالة دجاج الكفيل الي الجماعة سوو ماركة مسجلة المهم معلينة نرجع لمرجوعنه ... كول ساعة ساعتين ثلث ساعات الولد ماكوا .... انا كلت هذا الملعون وين ولى هي نص ساعة هواية.... زين هذا صارلة ثلاث ساعات ولو هو اكيد ما صدك يطلع برة يسويلنة طلابة وية ابن جاسمية ام الكيمر يومية فاشخ الولد وامة هادة علينه ما اطول السالفة اجا الولد بوية وين جنت تحقيق منا نعال لاستيك من امه اعترف الولد كعد يسولف القضية ... ثاري هو شلبالة رايح للديوان مال شيخ ومتلاكي هو عباس ابن الشيخ سائلة عبيس ها بوية سالمين كلة لا والله بس ابوية دازني ادور بالديوان على واحد عنصر او حاقد دينيا واذا ما الكاه اجيب ابو الكرر من ذيلة ...... لاتكلي ولا اكلك هذا عباس هو خوش وليد واخو خيته سمط بالامريكان هو ومجموعته علما الله كللهم بس وشردوا الامريكان لقواعدهم وهسة هو مطلوب من فيلق بدر والانفصالين وحكومة دولة الفافون علساس هو جان يقاتل القوات الصديجة ... بس هو بيه عيب واحد هذا عبيس بيه طفكة شوية يعني مستعجل جا ماسواهه نوبة وطك العبوة علينة كبل ما يوصلون الامريكان وخلة طرادنة مالة والي بس هم ميخالف المهم نرجع المن لمرجوعنه ...... كول عباس ماجذب خبر واشتغلت التلفونات مالتة عندة ثلاث تليفونات وكل تلفون بيه سيم كارتات اثنين تعرف انته ديموقراطية وكلمن بكيفة واشتلغت ما خلة واحد ما خبرة شلش الوادم كلها كول جتي الوادم على على عباس ها عباس شني الخبر كالهم انا جتني رسالة مشفرة وهسة احنة لازم نحلهه الجماعة كالوا شني عمي كالهم راح يصير هجوم على الديوان والي يقومون بيه الانفصالين الاكراد والحاقدين دينيا يعني فيلق بدر والجاسوس اسمه ابو الكررر ...... واحد من الربع نب عليه كلة ليش الهجوم على الديوان كلة لان مشتبهين بوجود اسلحة بالديوان الاخر كلة بوية مال بيش مركة الانفصالين وية فيلق بدر يهجمون هاي شوية بعيدة لان الجماعة بيناتهم خلافات خصوصا بعد الدكة الفاينة الي دكهم بيه عادل عبد المهدي تعرف انته كبل السرقات مشتركة يعمن اللواء الرئاسي جان من يبوك يبوك لثلاث حصص حصة عادل والمجلس الاثول وحصه جلال الطلي باني وحصة الحزب الااسلامي وجماعة الهاشمي عويدل شسوى راد يضربهم بوري ويسوي البوكة بالنص بينه وبين رئيس دولة الفافون والجماعة تخاربوا بيناتهم واحد كلة بوية حجايتك عدلة بس احنة هم ما نعرف هذا ابو دولة الفافون يجوز طاح عليهم وفصلهم من راح للشمال جا ماشفته من راح لسليمانية عدل ومراح لاربيل اول خصوصا هو اخذ معاه جم عمامة اربطعش على مية واثنين وستين وفوكاهه دنلوب يجوز اطوهم حصة .... نب عليهم عبيس كال بوية تصالحوا ما تصالحوا هاي ما يخصنة بيهه احنة لزمنا ناخذ حيطة وحذر المهم عبيس وزع الدوريات وقسم البطات والاوبلات حسب المنهج ... نب عليه واحد من السادة كلة بوية لازم نستشرع بالموضوع جان يكلة عبيس خايب صجيجة بماي فوح تستشرعمن بوية السيد وعزل وراح هسة بسوريا مدري بتركيا ما ادري وين والتايرات صارت مطافره مالة والي جا تستشرعمن الاخرس الاخرس هسة صار رجاج وبطل بعد مايستشرع بعد الفضايح هاي لا تكلي ولا اكلك نتشروا الجماعة ... عبيس جمع الغيادة مالتة وكالهم هسة احنة بالسيفتي بس كلولنة هذا الجاسوس ابو الكرر منو هنا نب واحد كلة خاف يقصدون يونس ابو الزمايل كلة لابوية يونس من جان سكران وعبر الشارع ونكصت رجلة طفر وراهه لايران واخذ وياه اسماء الضباط مال جيش العراقي وداهن لاطلاعات وهناك اطلاعات اطوه جم فلس وحديدة ولزكوه بجلاق معدل كبل لاستراليا وهسة صاير وطني ويصيد سمج واسس شركة مال افلام خلاعية وهسة يبث على الهوت بيرد مباشر من غرفة العدالة ههههههههههههه غسل الغسللك ييونس مالكيت غير هاي الشغلة الغمة جا مال كبر وبصفة شرطي كلما تطلع يرجعك بيه ... ماعلينة الجماعة عبيس وربعة داخوا بابو الكررر منو جان واحد ينب كلهم بوية تتذكرون من اطينة الفرس الزينة للزمال وجابت جحش جا الجحش هم كررر ويمكن سموه صلاح وخصوصا هذا الجحش يومية يسبهه لان مكتبتلة حصة بالبيت والنسابة اخذوا البيت وراحت الملايين عليه جا هذا مو كرر الي يسب امه يومية ويكول عليهه كاولية عبيس كال هذا صليح الا احطة بالصندوك مال بطة عبالة هو حصان زين ويستعرض ويه الاصايل تاليهه طلع كرر هذا جا خوش وين يروح المطلوب النه .......جان يهوس بيهم عبيس عدنة سلاح برنو مجيس ومضموم وعدنة زلم خشنة الما تعرف النوم هذولة احنة التميم ويشهدلنة اليومها خوتي ها ... الحارب ولد الملحة خل يحضر تابوتة .. عليهم المهم نرجع للسالفة مالتنة شوية ولن سيارتين بالباب دكوا الباب طلعت انه ولن عبيس شايل نص اخمس والجماعة مسلحين كتلة ها بوية سالمين خوما انوخذة كال لاوالله عد عيناك بس احنة حلينة الشفرة كلهه كتلة شمالك بوية ياشفرة كال الشفرة الي دزيتهه وية المحروس خليل مال ابو الكرررر وعرفناهم منو وهسة احنة متخذين كافة الاستعدادات .... انا تبرغثت بالكاع من الضحك عجوسي جماميزي تفغصن تفغص .... كال بوية شو تضحك ولنة ماد ايدة على السركي مال نص اخمس انا كلت نوخذنه وعلي.... بوية عبيس تهدة بالرحمن واتعوذ من الشيطان بوية لا شفرة ولاهم يحزنون تجنب سلاح عبيس اعطي امر بالتفرج للجماعة وانا افهمك المهم عبيس اطى امر بالتفرق وطب للبيت كلاص ماي بارد وياه ميرندا من الثلاجة المهم هدى عبيس ... شرحتلة السالفة بما انزلت جان يضحك ونب علي كال بوية هذا صاحبك مالكة غير هاي الشورة عليك تدز خليل للديوان وانا من جيرة بكصتي عبالي شفرة من مالات كبل وكاعدين نحلل بيهه ولميت الربع كلهم تالي يطلع انذار كاذب جان كلك اطيه فلوس وهو يشتري ميرندا ساعة ميرجع هسة تعال لازم تعشيهم الربع كلهم ...كتلة بوية سهلة على العشى نجيب الكررر ونذبحهه ونطبخة اليوم عشى هههههههههه شفت بلة عليك يالزاير شلون ورطنة بسمار ابو خليل التميمي / بغداد المسورة بكتل الاسمنت

‏ليست هناك تعليقات: